ڈاکٹر فرید الدین بقائی 22 مئی 1935ء کو دہلی میں پیدا ہوئے۔ تشکیلِ پاکستان کے بعد اُن کا خاندان ہجرت کرکے کراچی آگیا۔ ڈاکٹر بقائی نے 1958ء میں ڈاؤ میڈیکل کالج، کراچی سے ایم۔بی۔بی۔ایس (M.B.B.S) کیا، بعد ازاں جناح پوسٹ گریجویٹ کالج میں اُن کے ایک استاد کرنل سعید احمد نے سرجری کے شعبے میں ڈاکٹر بقائی کی مہارت اور دل چسپی دیکھتے ہوئے اُنھیں اعلا تعلیم کے لیے 1965ء میں برطانیہ بھیج دیا۔

ڈاکٹر فرید الدین بقائی اور اُن کی اہلیہ ڈاکٹر زاہدہ بقائی، دونوں ہی نے سرجری کی تعلیم حاصل کی تھی، جب وہ پاکستان اور برطانیہ سے طبعی تعلیم (medical education) مکمل کرچکے تو اُنھوں نے 1969ء کی دہائی میں کراچی جیسے بڑے شہر کی ضروریات کو پیشِ نظر رکھتے ہوئے ناظم آباد نمبر3، کراچی کے علاقے میں ایک پرائیوٹ ہسپتال کی بنیاد رکھی جس کا نام ’’بقائی ہسپتال‘‘ رکھا۔ جلد ہی یہ 350 بستروں پر مشتمل اور ضروری سہولیات کا حامل ایک جنرل ہسپتال بن گیا۔

بعد ازاں ڈاکٹر بقائی نے اس صورتِ حال کا ادراک کرتے ہوئے کہ حکومت طبّی سہولیات فراہم کرنے میں زیادہ تر شہری علاقوں کو ترجیح دیتی ہے اور دیہی علاقے محروم رہ جاتے ہیں، 1976ء میں کراچی سپر ہائی وے کے قریب بقائی میڈیکل کمپلیکس کی بنیاد رکھی جہاں پاکستان کا پہلا دیہی طبی مرکز (Rural Medical Center) قائم کیا گیا۔ بقائی میڈیکل کمپلیکس اب بقائی میڈیکل کالج، بقائی ڈینٹل کالج اور بقائی انسٹی ٹیوٹ آف ہیلتھ سائنسز پر مشتمل ہے۔

Baqai Hospital
111-B-1/8, Nazimabad No. 3, Karachi, Pakistan
36618085 – 36618082

شوکت عمر میموریل ہسپتال کا سنگِ بنیاد 1969ء میں ڈاکٹر قدسیہ شوکت نے رکھا۔ ڈاکٹر قدسیہ نے جب ہسپتال بنانے کا ارادہ کیا تو اُن کے پاس مطلوبہ رقم نہیں تھی لیکن اُن میں اپنے ارادے کو پایۂ تکمیل تک پہنچانے کا سچا جذبہ موجود تھا، اُنھوں نے اپنی جمع پونجی اور کچھ رقم اُدھار لے کر اس ہسپتال کا آغاز کیا۔ ہسپتال کے قیام کے وقت اس میں صرف 20 بستروں (beds) کی گنجائش موجود تھی۔ کچھ عرصے بعد ہسپتال کو ابو ظہبی کی جانب سے عطیات ملے جس سے اس کے رقبے میں اضافہ کیا اور ابو ظہبی بلاک بنایا گیا، اُس کے بعد جرمنی نے بھی ہسپتال کو عطیات فراہم کیے چناں چہ ہسپتال میں جرمن بلاک کی قیام بھی رکھی گئی۔

ڈاکٹر قدسیہ شوکت نے یہ ہسپتال اپنے شوہر کے نام پر قائم کیا تھا، اپنے شوہر کے انتقال کے بعد اُنھوں نے یہ ہسپتال 1979ء میں مکمل طور پر فوجی فاؤنڈیشن کے حوالے کردیا۔ اب اس ہسپتال کے پاس تقریباً 2 ایکڑ جگہ ہے، اور گنجائش 20 بستروں سے بڑھ کر 200 بستروں تک ہوچکی ہے۔ اس کے علاوہ 2 آپریشن تھیٹر (Operation Theater) اور 2 انتہائی نگہداشت یونٹ (Intensive Care Unit) قائم ہیں جن میں ایک میڈیکل اور ایک سرجیکل ہے، اس کے علاوہ یہاں دیگر ضروری طبّی سہولیات بھی میسر ہیں۔ ہسپتال میں کئی اسپیشلسٹ ڈاکٹرز (Specialist Doctors) بیٹھتے ہیں اور اس کا انتظام فوجی فاؤنڈیشن کے پاس ہے۔ یہاں فوجیوں کا علاج مفت کیا جاتا ہے جب کہ عام لوگوں کا علاج بھی مناسب قیمت میں کیا جاتا ہے۔ ہسپتال میں کئی خوب صورت باغ ہیں۔

ڈاکٹر قدسیہ کی اس ہسپتال کے لیے خدمات کے خراج میں اُنھیں فوجی فاؤنڈیشن نے اسی ہسپتال میں رہنے کی جگہ اور کاموں میں مدد کے لیے نوکر فراہم کیے ہیں، جب کہ کہیں آنے جانے کے لیے ڈرائیور کے ساتھ گاڑی کی سہولت اور مفت علاج کی سہولت بھی دی گئی ہے۔

فوجی فاؤنڈیشن کے زیرِ انتظام آنے کے بعد اس ہسپتال کا نام شوکت عمر میموریل ہسپتال سے بدل کر فوجی فاؤنڈیشن ہسپتال (Fauji Foundation Hospital) رکھ دیا گیا لیکن اب بھی ہسپتال میں کچھ جگہوں پر شوکت عمر میموریل ہسپتال یا شوکت عمر میموریل فوجی فاؤنڈیشن ہسپتال لکھا نظر آتا ہے۔ اس ہسپتال کو ان دنوں بریگیڈیئر محمد محمود چلارہے ہیں۔

مریضوں سے ملاقات کے اوقات:
پیر سے سنیچر (ہفتہ): شام 7 بجے سے رات 8 بجے تک۔
اتوار: صبح 10 بجے سے شام 5 بجے تک۔

شوکت عمر میموریل ہسپتال/ فوجی فاؤنڈیشن ہسپتال
شاہ فیصل کالونی نمبر 2، نزد عید گاہ گراؤنڈ،
کراچی۔
Telephone # +92-21-34573172-3
Fax # +92-21-34576943